Antonio Nicòli
A VRÌA
A vrìa
èssa ‘n cruchèl
par vulè tel cél
e fèm traspurtè dal vènt.
A vrìa
èssa ‘n barchét
e fèm ninè da i lónd
cum un fiulén.
A vrìa
èssa na nuvla
par cerchè n'antre mond
e ‘n cél pió bèl ancora.
A vrìa… no,
an vrìa pròpi un bèl gnent
d'pió de quant a jò.
A ‘N SO' SÓL
El giórne
ch' l'ariva pièn pièn
fa fùggia la nòt.
"Bongiórne" a sosùr,
mo en c'è la risposta.
A so' pròpi sól.
Po', èch, d'impruvìs,
a sènt dentra d'me
a rida, a dscurra, a cantè
e alora a capisc'
che sól a ‘n so' pròpi:
i mia i è tutti sa me.
E' BÈL
E' bèl
a véda i cruchèi vulè tel cél
sa sól che ‘l scumparisc'
dria mal san Bàrtol in fiór.
E' bèl
gòda a la sera, senza pensìr,
el suspìr del vent che ‘l carézza
pièn pièn la facia tua.
E' bèl
fermès in sla riva del mèr
par sentì ma i lónd
§ch' i dscur sotvóc tra d'lóri.
E' bèl
a téna
sotbrac ma l'amór tua
guardad la luna péna
che d'argènt la pitura el mèr.
E' bèl sè, quest,
parchè gnènt'atre t'va cercand.
Che pchèd ch' tócca gì via
adès ch' a jò artruvèd la pèc.
EL FIL D'ERBA
Anca s' l'è nèd
tramèz ma i sas
cum na rubcéna da gnènt,
a guardèl bèn
senza i milla pensìr
ch'i c'apána i och',
véda s'pudrìa
el Mond.
A ‘N GAMBI GNÈNT
Quant incmìncia a fè scur
e ‘l cél d'milla culór dvènta
i pensìr mia indrìa tel tèmp i cur
e i s'amìschia tra d'lóri
cum i culór in t'un quèdre d'avtór.
L'è in chi mumènt acsè
ch'indrìa a vrìa arturnè
par gambiè del pasèd
quél che ‘n fussa stèd
cum mè a l'avléssa vlùd.
Mo prò subte a m'incòrg
ch'l'è molt pió méi lascè
tut quant acsè cum è,
parchè a jarfarìa cumpagn
senza gambiè ‘n bèl gnent.
TEL SILENZI DLA NÒT
El silenzi dla nòt
el pògia le su' mèn
sora ma i tét
carezandi pièn pièn
par nun svighiè dal són
sta cità bèla.
Na bèva d'vènt
in punta d'pìd la pasa
tra mèz ma i fil dla luc
ch'i dvènta d'incant
còrd de viuluncèi e viòl
che sotvóc i canta
l'amor pió grand par te
o Pésre mia.
E mè, cum ‘n t'un insòni,
a vagh giranduland
par le strèd e le piaz
e curtil pió arpost
rentrand dentra de te
cum s'a jarturnàsa
dentra tla mèdra mia
e arnascia acsè
n'antra volta ancora.