Quest l'è ‘n giorne dediched
ma tutt quei ch'i è inamured,
par fè ‘n mod che tutt la gent
l'an te fassa finta d'gnent,
i à mess d'mezz San Valentén,
e d'acsé tutt'i cristièn
tun ste mond ch'l'è pén d'caprecc,
i t'à mess t'un bell inpecc
ma ste Sant, ch'an sà cum s'fè
dal lavor ch'l'à da sbrujè,
sa le manigh tired só
ste purett an ne pò pió,
chel por chen d'San Valentén
an sà gnanca do‘ s'dè l'mèn:
sa chj inbroj che c'è ‘n tl'amor
l'à muchied tant d'chel lavor
che ‘l t'è tutt stracch e suded.
Che giurneda por sgrazied!
Cum se ‘n tutt'i giorne dl'ann
fora d'quest, c'fuss sol i dann,
pèr ch'l'amor c'è sol ste giórne
e in tutt chj atre sol i còrne,
quell che ‘l t'à invented sta festa
an s'pò dì ch'an à la testa,
l'à studieda propi bèn,
d'fè ‘n regal an s'pò fè d'mén.
T'sà ch'an è fecil pargnent?
L'è par quest che ‘n scrull de gent
o ch'i è grand o ch'i è ragazz
i s'artrova ‘n tl'inbarazz,
indecis se cunprè i fiór
o ‘l parfum o qualcò d'òr.
S'le muros le t'mett só ‘l mus
l'è parchè li è molt delus,
par co'fè ‘l parfum o i fiór?
Li avria vlud un qualcò d'òr,
saria sted tutt molt pió bell
se ‘n tel ded c'fuss sted ‘n anell.
Se tè t'fa ‘n regal sbajed,
pò fnì tutt a bastuned,
s'an t'inzecch quant tè te l'scej,
i t'fa ‘l diavle ‘n tle famej:
che cumerc ch'l'è dvent l'amór,
giorne recch d'aferi d'òr,
sa chel por San Valenten,
i t'fa tutti ‘n scrull d'quadren.
Fernando Magi
|
Per Stampare Questo Articolo
